შავლეგ შილაკაძე (დაბად. თბილისში, 21.02.1940), ქართველი კომპოზიტორი და დირიჟორი, თბილისის ვანო სარაჯიშვილის სახელობის სახელმწიფო კონსერვატორიის პროფესორი, კამერული ორკესტრის ~თბილისის კონცერტინო~ სამხატვრო ხელმძღვანელი.

დაამთავრა თბილისის სახელმწიფო კონსერვატორია ალტის (პროფ. ა. ბეგალიშვილი, პროფ. ლ. იაშვილი) და კომპოზიციის (პროფ. ო. თაქთაქიშვილი) კლასი. 1968-71 წწ. იქვე სწავლობდა საოპერო-სიმფონიური დირიჟორობის სპეციალობაზე (პროფ. ო. დიმიტრიადი) და 1974 წ. დაამთავრა ლენინგრადის ნ. რიმსკი-კორსაკოვის სახელობის სახელმწიფო კონსერვატორია (პროფ. ნ. ს. რაბინოვიჩი, პროფ. ა.ს. დმიტრიევი).

1959-1969 წწ. საქართველოს სახელმწიფო სიმფონიურ და კამერულ ორკესტრებში. მისი საკომპოზიტორო დებიუტი შედგა 1958 წ., ხოლო სადირიჟორო - 1966 წ. 1969 წლიდან მუშაობდა თბილისის პირველ სამუსიკო სასწავლებელში, თბილისის სახელმწიფო კონსერვატორიაში (კამერული ანსამბლი, ორკესტრი), 1973-1974 წწ. ხელმძღვანელობდა საქართველოს ფილარმონიის კამერულ ორკესტრს, 1976-1977 წწ. მუშაობდა საქართველოს სახელმწიფო ფილარმონიის კამერული მუსიკის განყოფილების ხელმძღვანელად.

1976 დააარსა კამერული ანსამბლი ~თბილისის კამერატა~, რომელსაც 1985 წლამდე ხელმძღვანელობდა. ამ ანსამბლთან მან ჩაატარა 300-მდე კონცერტი საქართველოში და სსრკ უმნიშვნელოვანესი კულტურული ცენტრების საუკეთესო დარბაზებში - მოსკოვში, ლენინგრადში, კიევში, მინსკში, ვილნიუსში, ტალინში, ოდესაში, ბაქოში, ერევანში და სხვ.

1988 წელს მან დააარსა კამერული ორკესტრი ~თბილისის კონცერტინო~, რომელთან ერთადაც ჩაატარა 300-ზე მეტი კონცერტი საქართველოში და საზღვარგარეთ - გერმანიაში (1990, 1991, 1993, 1995, 1996, 1997), ესპანეთში (1993 წლის მარტში და ოქტომბერ-ნოემბერში), შვეიცარიაში (1996, 1997) და დიდ ბრიტანეთში (ლონდონსა და ედინბურგში, 1998 წ.)

1999-2002 წწ. იგი მიწვეული იყო კაიროს ხელოვნებათა აკადემიის სიმფონიური ორკესტრის რეზიდენტ-დირიჟორად. ამ ორკესტრმა შ. შილაკაძის ხელმძღვანელობით კონცერტები გამართა კაიროსა და ალექსანდრიაში, 5 კონცერტი ჩაატარა ესპანეთში, მურსიის ახალგაზრდული ორკესტრების საერთაშორისო ფესტივალზე, თანამშრომლობდა კაიროში მოქმედ კამერულ ორკესტრთან ~ამადეუს~.

შ. შილაკაძე საქართველოს კომპოზიტორთა კავშირის წევრია 1973 წლიდან.

შ. შილაკაძის სადირიჟორო რეპერტუარში არის ბახის, ბარტოკის, ბეთჰოვენის, ბიზეს, ბრამსის, ბრიტენის, დვორჟაკის, ვერდის, ვივალდის, კორელის, ლუტოსლავსკის, მალერის, მოცარტის, ონეგერის, ორფის, რამოს, სტრავინსკის, შონბერგის, შოსტაკოვიჩის, შუბერტის, შუმანის, შუტცის, ჩიმაროზას, ჰაიდნის, ჰენდელის, ჰინდემიტის კამერული, სიმფონიური, ვოკალური, საოპერო და კანტატა-ორატორიული ჟანრის ნაწარმოებები, აგრეთვე ქართველი კომპოზიტორების ვ. აზარაშვილის, ი. ბარდანაშვილის, ზ. ბუცხრიკიძის, რ. გაბიჩვაძის, ნ. გაბუნიას, ი. გეჯაძის, ნ. გიგაურის, ო. გორდელის, მ. დავითაშვილის, ო. თაქთაქიშვილის, ე. ლომდარიძის, ნ. მამისაშვილის, ს. ნასიძის, მ. ოძელის, კ. როსებაშვილის, შ. შილაკაძის, ს. ცინცაძის და სხვათა ნაწარმოებები.